Selecçom galega...até que enfim (e a luita continua)

Até que enfim vamos ter selecçom galega de futebol, e inclusso parece que há data para o primeiro jogo, ainda que o que nom se sabe por enquanto é qual vai ser o primeiro rival desta selecçom. Seja qual for, estará bem ver a jogadores do país defendendo as nossas cores, por cima das rivalidades lógicas e habituais. Mas a luita continua. Quero dizer que isto a nível simbólico está bom, que tem também a sua utilidade, porque dá a oportunidade a jogadores moços de colher rodagem internacional e darem-se a conhecer, mas que primeiro; nom abonda apenas com o futebol, deve haver selecçom galega em todos os desportos, e segundo; deve haver umha lei de selecçons desportivas que regule a participaçom em competiçons oficiais dos nossos e as nossas desportistas aló onde for em princípio legalmente possível. Nem que dizer tem que o objectivo político para todo o nacionalismo sem distinçom deveria ser que esta selecçom galega puidesse jogar competiçons oficiais, igual que o fam outras selecçons que representam a territórios sem estado próprio.

O problema é que continuamos a dar bastante peninha como sociedade, porque afinal esta já medianamente velha reivindicaçom se vê satisfeita nom pola pressom que se exerceu desde a rua ou desde as bancadas, mas por umha decisom institucional. E nom podemos aguardar que desde os escritórios nos resolvam tudo. As torzidas dos clubes galegos, em muitas ocasions derom espectáculos lamentáveis, de antepôr nom já rivalidades desportivas, mas mesmo liortas pessoais a um objectivo que devia ser comum. A imensa maioria da paróquia futeboleira passou do tema, olhava-o com condescendência, com indiferência, e nalgum caso com hostilidade. Afinal parecia cousa de certas penhas juvenís, mais que outra cousa. Nom se aproveitou o potencial que podia haver no desporto modesto e de base...estou absolutamente seguro de que de aí se podiam tirar muitos apoios. Sempre recordarei que há uns seis ou sete anos...ou se calhar mais!!! vim pola tvg um inquérito entre jogadores galegos de andebol e todos estavam a favor de umha selecçom galega deste desporto...como nom vam estar a favor os desportistas e as desportistas galegos e galegas de poder jogar encontros internacionais, ainda que forem amigáveis? E neste primeiro jogo da selecçom galega de futebol parece que se vai contar com jogadores da primeira e a segunda divisom...mas estou absolutíssimamente seguro de que há umha maocheia de jogadores de segunda B, terceira ou categorias nom profisionais que estariam encantadíssimos de jogar defendendo as cores da Galiza.

Só um problema...que vai ser a "Selección de Galicia" e nom a "Selecçom da Galiza"...nem sequer a "selección da Galiza". Mas, por enquanto, vamos ver se a iniciativa, ainda que seja de natureza institucional, começa com bom pé.