O adeus dos Diplos

Os Diplomáticos de Monte Alto som umha legenda de bairro à altura do Boca Júniors, como mínimo. Cada um dos membros da sua primeira formaçom, Xurxo Souto, Rómulo Sanjurjo, Guni, Mangüi, Marcos "Viascón"...arrastam trás de si peripécias como para escrever um livro de duzentas páginas ou mais. Ninguém na Corunha pode dizer que nom saiba umha cançom dos Diplomáticos...quero dizer ninguém na Corunha que nom tenha estragado a sua juventude em discotecas onde te ametralham todos os Sábados com éxitos de rádio-fórmula. Qualquer pessoa que vivera aquela Corunha das manifes anti-militaristas da primeira guerra do golfo, ruidosas, cheias de um estudantado que se revelava contra o que parecia ser o destino de umha geraçom que já fora tildada de conformista, aqueles Sábados de tarde no Borrazás e noite em Punto 3; aquela Corunha de A Coruña Moito Heavy, dos albores do Súper Dépor, quando os do Komando Barricada lhe deram umha impressionante malheira aos Niki Sur e os Riazor Blues deixaram de ser fachas (...hehehe, o medo é livre...) aquela Corunha de Los Skizos, de Os Verjalhudos, de Xudef Klass...quem tenha vivido aqueles tempos, sabe mais de umha e mais de duas cousas dos Diplos. E os Diplos cantarom as gestas do heavy Bestilleiro (o heavy Bestilleiro, árdelle o peito, pasa pola noite calor...) Marujo ou Arsénio Iglesias. Puxerom-lhe rostos e música a umha Corunha que nom saberiam entender de outra maneira. Há outras Corunhas, e estám na mesma Corunha que Paco Vázquez.Graças aos Diplos eu sei quem inventou o matraquilho e sei das andanças do Doutor Katanga. Mas parece que chegou o fim de trajecto, meus. Depois de dezaseis anos...

O Domingo, finiquita-se umha fructífera etapa do rock em galego; deixa-nos umha banda constante e prolífica. Fecha-se o ciclo dos Diplos, quando já há abertas outras vias: O Xurxo já há algum tempo que anda a navegar umha nova travesia com Os Tres Trebóns e O Vendaval do Rosal. Partilha este projecto com Antón (ex-Papaqueixos) O Vendaval (Dandy Fever) e Amil (Os Diplomáticos). Suponho que os Diplos servirám de matriz para outros projectos nom menos interessantes. Um abraço e boa sorte para todas as pessoas que forom fazendo parte de Os Diplomáticos de Monte Alto e...boa viagem ao Olimpo da música galega, onde co-habitaredes com os Tamara e Fuxan os Ventos.

Por de pronto, vemo-nos em Ortigueira.