terça-feira, agosto 10, 2004

Amig@s na rede...

Depois de algum tempo de parom, sem colar textos novos no blog, atopamo- nos com fólegos de abondo para ir editando post, com algum texto próprio por lá, algum texto alheio por cá...e hoje fazemos mençom a aqueles amigos e aquelas amigas que temos pola rede. E citamos os sítios onde @s podedes atopar, para que desfutar dos seus textos e pensamentos nom seja um prazer privado.

Elvira Riveiro ocupa um lugar de honor nesta página e eu espero em muito breve dispôr de algum texto para colar aquí. Desfrutar da sua poesia cheia de sensualidade, ternura e rebeldia aínda nom é possível em papel impresso, salvando algumha ediçom dos Relatos de Verán de La Voz de Galicia, mas tendes a possibilidade de lêr parte da sua obra em
www.bvg.udc.es, à parte de poder aprezar a sua faceta jornalística em www.culturagalega.org. Mas para quem nom ficar satisfeit@ com isso, eu recomendo Furor Scribendi, a sua bitácora pessoal, que atoparedes neste endereço: www.elvirariveiro.blogspot.com . Alí ides achar desde viagens, experiências pessoais de todo tipo, descobertas literárias, recomendaçons...até novas criaçons dela e textos de outros escritores e escritoras, galeg@s e do ámbito da lusofonia. A Elvira paga a pena conhecê-la, porque é umha pessoa sensível, dialogante e muito activa; tanto que desborda. Mas este país necessita, na cultura e em todos os campos, pessoas inquietas. Tivem a oportunidade de falar cara a cara com ela em duas ocasions. Umha delas num recital memorável celebrado em Compostela e intitulado Acción de amor; e melhor nom vos exprimo como é que se lhe chegou a chamar assim, mas o caso é que foi toda umha mostra de audácia por parte d@s companheir@s das Redes Escarlata (www.redesescarlata.org) todo um exercício de coerência em homenagem ao amor, porque...é possível o amor sem a audácia? Escandalizar aos passeantes domingueiros da Alameda, chantar-se a recitar poesia a toda voz no Mercado de Abastos ou cortar o tráfico na rua Aller Ulloa é audácia...e eu fiquei conmovido com esses actos de audácia. Outra das ocasions, recentemente no Festival da Terra e a Língua, que todos os anos organiza a Fundaçom Artábria (www.artabria.net) no moinho do Pedroso, em Naróm. O culpável da parte poética do evento é, por certo, Miguel Vento, de cuja obra também podedes têr noticia a travês da Biblioteca Virtual Galega. É um génio, que um dia ganhou um sobresaliente em Língua Galega (fazendo o Bacharel para Adultos) ao conseguir superar um repto plantejado pola sua profesora: escrever um poema que descrevesse um barco, mas sem levar a letra “e”. Paga a pena conhecê-lo, ainda que seja apenas para que che conte a estória. Pois Elvira, que é umha pessoa muito tímida – cousa que lhe tem causado nom poucos problemas – puido comprobar como um ainda o é mais...mas a pesar das minhas dificuldades para falar cara a cara, som muitas as horas que passamos no bate-papo a conversar sobre os temas mais diversos. A ver se nos re-encontramos aginha.

Este periplo pola rede nom pode continuar sem mencionar a outra das minhas escritoras predilectas: Alízia Fernández, ou Ferro, que também pode valer, segundo apetências, é umha acaparadora, no bom sentido da palavra, de prémios, e surpreende a sua madurez, o seu domínio da palavra, o seu dom incomparável para resgatar o sentido poético das cousas. Quando ganhou o último concurso de cartas de amor de Rádio Fene, a secretária do júri perguntou-lhe: “Nasceches no 76, nom é?” e ela, com toda a naturalidade e para a surpresa da sua interlocutora respondeu: “Pois nom; nascim no 86”. Com efeito; a minha amiga Alízia vai cumprir 17 anos o 16 de Novembro. Também a ela a podedes atopar na Biblioteca Virtual Galega.

Mencionar também a bitácora de Alberte Momán Noval, um ferrolano da minha geraçom, do 73, membro das Redes Escarlata, e na actualidade residente em Alhariz. O endereço é
www.albertemoman.blogspot.com. É um blog de pensamento político, de literatura e de rebeldia. Sentido crítico e conteúdo, fogindo de pedantarias e artifícios. Ontem re-encontrei-me com este blog, depois de muito tempo sem um momento para fazer umha parada e tomar umha raçom de versos cozinhados com o seu toque de combate; estava imerso em lides mais concretas, de política pura e dura, mas finalmente cheguei aló, fixem a minha consumiçom e deixei constáncia escrita da minha presença antes de marchar, como mandam as regras da cortesia.

Quem quixer humor, rebeldia estética, histrionismo e activismo lingüístico, que visite
www.pepilucibom.tk, a página da minha amiga Sabela, também umha novíssima rapariga, a sócia mais jovem da Associaçom Galega da Língua (www.agal-gz.org). Alí atoparedes sado-masoquismo a maço, estética punk e mitomania almodovariana. Nom perdades de vista o blog da Pépi, que tem ligaçom nessa mesma página (a Pépi é Sabela, claro).

Já daremos outro passeio pola rede, quiçá escrevamos um post sobre páginas políticas; por enquanto detemo-nos na página do também amigo Pepe Cunha; um Vila Podre de pro, impulsionador de
www.abretedeorellas.com, portal galego de cultura e lecer, altamente recomendado; jornalismo cultural feito com um grande sentido crítico e em língua galega, naturalmente. Anda embarcado o meu amigo José Luís Cunha num projecto ambicioso e realmente louvável: a criaçom de umha rádio livre em Trasancos: Rádio Filispím é como se chama o projecto, canalizado a travês do colectivo Opaí. A Lei de Grandes Cidades, que próximamente se aprovará em Ferrol é umha séria ameaça para este necessário e interessante projecto, mas a solidariedade das gentes da cultura de Trasancos é umha garantia de que isto nom vai ficar em augas de bacalhau...derrota trás derrota até a vitória final!!!

1 Comments:

At 10:16 PM, Blogger tangaranho said...

Vaia, vaia; entom estava eu mal informado acerca do Alberte: enfim, ele me saberá desculpar. A intençom era boa...falarei nesta página de Poetas na Rua...um abraço...

 

Postar um comentário

<< Home