Ferrol

Já voltei de Ferrol. Alí estivemos a recitar o Sábado, em Sam Joam de Filgueira, perante um auditório que ultrapassava os sessenta anos de média. Mas encantad@s, isso sim, do trato recebido a todos os níveis. Sinto nom ter ficado a ver a coral que actuou depois do recital que tivem o honor de partilhar com Alberte Momán, Elvira Riveiro e Oscar Antón Garcia, mas eu tenho certa alergia a esse género musical. O resto dos meus companheiros de palestra sim ficarom ao concerto e depois ao “terceiro tempo” do evento, leia-se petiscos. Eu como nom sento devoçom polas corais, como acabo de dizer, e aliás os meus acompanhantes (O meu primo e mais o Pepe Cunha) convergiam comigo no anseio de passar por Artábria, que anda nestes dias a celebrar o seu sexto aniversário, marchei e depois ainda puidem desfrutar de umha divertida conversa com o Miguel Vento (o incombustível Miguel Vento) e os companheiros de cartaz que também lhe fixerom a sua visita de rigor às ártabras hostes.

O Domingo, tocou manifestaçom contra o feche da factoria de IZAR-Fene. 40.000 pessoas, e umha boa parte delas nada dispostas a converter aquilo numha procisom. Houvo consignas que faziam referência clara a que algumhas presenças lá nom eram oportunas. Algum provou o champú de ovo. Ainda bem. Para fazer o que alguns pretendem fazer, nom fam falta manifestaçons. Se queremos um acto vitimista e inóquo, sem qualquer rastro de combatividade, pois fazemos umha procisom com o alcaide, o crego e o sargento da guardia civil à cabeça, sacamos a passear à virgem de turno, e depois a casinha todos, a rezar e resignar-se com o que venha. É absurdo fazer umha manifestaçom polo futuro do sector naval e nom assinalar as responsabilidades políticas que houver. Nada pintavam nessa manifestaçom elementos como Juan Juncal, Juan Fernández ou Xesús Palmou. Esses, que desfagam o entorto que provocarom. Nom sei quem lhe atirou os ovos a Juan Fernández, mas eu aplaudo-lhe.

Amanhá colarei algum poema por aquí.