XXXIII aniversário

Morreu na cama, e nom pendurado do pescoço numha praça pública. Mas deixou umha fonte inesgotável de piadas.

Piratas no Índico

A mim parece-me que o que se prepara, quando se fala de mandar forças internacionais às costas de Somália, nom é exactamente umha cruzada contra a pirataria. Se pensamos um pouco, no Corno de África há petróleo, nom é? Somália acaba de estar em guerra com um país aliado de Israel, concretamente Etiopia, nom é? Somália sofreu há uns dez anos bombardeamentos por parte da aviaçom ianque, sob a acusaçom nunca provada de acubilhar ao Ben Laden, nom é?

E como é que agora nos lembramos de que no Índico há piratas? Porquê nom lhe perguntamos a centos de marinheiros galegos que tenhem faenado durante as últimas décadas nas costas de Somália, Namíbia, Moçambique, a ver se havia piratas ou nom? Algo cheira a podre...

O Tangaranho entrevista a Núñez Feijoo

Hoje tenho umha cita bastante especial, estou algo nervoso. O Tangaranho está a ponto de marcar um novo fito histórico na sua andaina, depois de entrevistar a Maraino Rajoy. Pensamos que depois do tumultuoso final do nosso encontro com Dom Mariano na cafetaria Manhattan da Corunha, nom seria fácil contactar com outros persoeiros do PP, mas Alberto Núñez Feijoo nom puxo excessivos reparos em concertar umha entrevista comnosco, a cámbio de um almorço num restaurante compostelano cujo nome nom desvelaremos.Suponho que os tambores de contenda eleitoral animarom ao líder popular a abrir-se ao diálogo com outros méios que nom forem os afins.

Apresenta-se aparentemente afável, com esse sorriso que sempre me puxo tam nervoso. Ficamos em pedir umha dosse de cozido e outra de chipirons. De beber, pedimos auga, porque os dous queremos estar lúcidos para a conversa. Naturalmente, falamos de eleiçons e falamos também de que vai acontecer trás umha hipotética vitória eleitoral do PP. Também falamos doutras cousas relativas a actual legislatura; conflitos como o dos armadores, as greves do transporte, a Lei do Solo, a paralizaçom do Plano de Desenvolvimento Rural, a zozobra da comissom do novo estatuto e o controvertido acordo sobre política lingüística. A conversa desenvolve-se animada, em princípio. Ainda que, obviamente, o líder conservador mantem um tensionamento lógico em quem sabe que nom está a falar com alguém que lhe vai facilitar o sair airoso das perguntas.

OTV.- Senhor Feijoo, nós quixéramos saber, como méio galego na internet, qual é exactamente a postura do PPdeG a respeito da língua, porque certamente há cousas que nos desconcertam e nos inquietam. A semelhança entre o discurso do PP e o de Galicia Bilingüe é cada vez mais manifesta. A nom subscripçom do último acordo sobre política lingüística, a rotunda negativa do PP a incluir no borrador do novo estatuto o dever de todo cidadao a conhezer a língua galega, a pretensom de tirar-lhe ao galego a condiçom de língua oficial...tudo isso parece conduzir-nos à expulsom do galego da vida pública.
NF.- Eu sabia que esta pregunta ia surxir, non vaia pensar que me sorprende. Insistentemente, o nacionalismo está a divulgar a mentira de que estamos en contra da normalización do galego, pero creo que é innegable que quen mais fixo pola normalización do galego foi Fraga. Antes de Fraga, non vale a pena nin imaxinarnos a Galicia, nin imaxinarnos o galego. Non paga a pena, porque, a quen lle interesa a historia de Galicia, realmente? A pertinencia histórica de Galicia como tal non é interesante para o pobo galego, que non está preocupado por cuestións identitarias. O simple feito de que ese grande estadista que é Don Manuel se lembrase do seu terruño, do que non tiña ningunha obriga de lembrarse, porque el é un home universal, que pensa universalmente, sen localismos impertinentes, xa en si é un xesto que engrandece a sua persoa e situa a Galicia no mapa en todos os sentidos. A gratitude dos galegos a Don Manuel por isto deberia ser infinita, pero está claro que de momento hai sectores radicais que non están dispostos a recoñecer a grande obra de Don Manuel. Seguro que a historia saberá poñer a cada un no seu lugar. A cousa é que, se Don Manuel nos situou no mapa, en esencia isto tamén implica que fixo moito polo galego, pois evidentemente tendo en conta que Galicia nin ten nin debe ter peso por si mesma, conlevando isto que ninguén ten porqué saber que existe, antes de que Manuel Fraga tomara posesión do seu cargo de Presidente en 1989 ninguén tiña porqué saber que existia a lingua galega. De feito, para qué queren os nosos paisanos saber que falan unha língua, se a fin de contas viviron ben e en paz sen sabé-lo até agora? Enfin, son ganas revoltá-lo todo. O normal é que as cousas sigan como sempre foron, esa é a verdadeira normalización.

OTV.- Portanto, daí se deriva que o galego nom deve ser idioma oficial da autonomia
NF.- No Partido Popular estamos a favor do galego, pero sen imposicións. O que non pode ser é que un señor de Valladolid non poida facer oposicións á Xunta. Queremos un país de cidadáns libres e iguais. E aos cidadáns non se lles pode marear con temas lingüísticos. Que ten de malo que os funcionarios se dirixan aos cidadáns en castelán ainda que estes soliciten atención en galego? Nin que o galego fora tanta cousa! Agora resulta que o galego é importantísimo! Se é tan importante porqué non o foi antes? Porque desde logo, cando eu estudaba non o era... xa bastante temos os cidadáns con asumir que o galego é unha lingua (que vaia, non estou eu moi seguro de que sexa tan bo que a xente o saiba...)se ainda por riba hai que coñecer o galego e utilizá-lo, a ver onde imos chegar...

OTV.- Tudo isso da liberdade e a igualdade sona magnífico. A questom é, realmente é honesto plantejar essas teses teoricamente nom intervencionistas (que eu penso que nom som tal, mas já chegaremos a essa parte do debate)sempre em funçom da livre vontade dos castelhano-falantes e sem ter em conta os direitos lingüísticos dos galego-falantes?
NF.- Cando eu falo dos dereitos dos cidadáns, falo dos cidadáns de ben. Paréceme absurdo que á compracéncia cos caprichos e veleidades de catro nacionalistas se lle chame "respetar os dereitos". Para que haxa dereito, ten que haber suxeito de dereito, pero aparte ese suxeito de dereito ten que querer saber que é suxeito de dereito e querer coñecer ese dereito e querer exercé-lo. Pero eu pregúntome para que serve a conciencia? Ás veces, cando me dá por reflexionar sobre cuestións algo trascendentes, chego a conclusión de que a conciencia a deberon inventar os marxistas...conciencia nacional, conciencia de clase...ganas de complicar as cousas...porqué temos os galegos que enlearnos a vida con cousas tan complicadas, se realmente estamos a falar dunha terra cuxa historia é en si unha impertinencia, cuxa cultura é innecesaria e cuxo pobo non ten interese nelas? Porqué tíñamos que estar interesados na lingua?

OTV.- Ressomindo, que você pensa pouco menos que ser um galego-falante conseqüente e conscienciado é ser um subversivo.
NF.- Eu o que penso é que o galego na boca dalguns sona mal

OTV.- Falemos de política cultural: Porquê é tam escandalosa a presença da Galiza na Feira do Livro da Habana?
NF.- Hai duas cousas: primeiro a colaboración cun rexime tan sanguinario como o castrista. Segundo, esa teima de pensar que a cultura galega pode ir por aí, mostrandose ao mundo sen aparecer da man da española. Eses experimentos marxisto-soberanistas, non poden ter o noso apoio.

OTV.- Já...e a postura do PP sobre o Gaiás, nom está tampouco demasiado clara...
NF.- Non está clara para quen non queira entender...Mire, nós estamos de acordo con continuar a obra de Don Manuel, porque estamos a falar do legado de Don Manuel. Agora, xa lle digo...nós o que non podemos concebir é unha Cidade da Cultura en mans dos amigos da señora Bugallo. Que estes pensan na cultura galega como se tivese importancia de por si, o cal loxicamente é un disparate.
(Continuará...)

Europa luita contra a crise (IV) : Manifestaçom contra os ERE em Barcelona

Sobre os nomes das ruas na Corunha

O rueiro corunhês transforma-se...às agachadas

O Presidente da Cámara Municipal da Corunha, Xavier Lousada, vem de anunciar novos cámbios no nomenclátor corunhês, cámbios que vam supôr a supressom de nomes de espaços públicos que remitem de umha maneira clara ao franquismo. As mudanças no nomenclátor estám-se a fazer pola porta de atrás, sem demasiado ruído, para nom levantar polémicas. Suponhemos que será umha condiçom imposta polos grupos de pressom reaccionários que apoiam a Lousada, a cámbio de nom desatar umha guerra mediática a conta deste tema. Em qualquer caso, à parte das condiçons de semi-clandestinidade nas que se estám a dar as mudanças, há outros aspectos deste tema nom menos criticáveis, e mesmo condenáveis.

Um governo local que leva como carimbo de apresentaçom o achegamento à cidadania, está a levar a termo umhas mudanças na paisagem urbana da Corunha, nas que o povo deveria ter muito que dizer. A penumbra mediática que envolve este tema, precisamente evita que se tomem decisons com as que a vizinhança se poida sentir identificada. Evitar o debate social, para que o povo valore a decisom ou mesmo faga as suas propostas, ou inclusso debata de maneira pública e a pé de rua estes cámbios com os sectores reácios a que as mudanças se deam, vai em consonáncia com essa falácia instalada nas linhas oficiais de discurso sobre esta questom de “nom abrir feridas”.

As mudanças no nomenclátor se estám a dar de umha maneira fraudulenta, porque se bem teoricamente se realizam para cumprir com a já raquítica Lei da Memória Histórica, o certo é que nem sequer cumprem com umha premissa fundamental dessa lei, que é a reparaçom e rehabilitaçom das vítimas. O que de nengumha maneira é admissível é que com o pretenso intuito de cumprir com a Lei de Memória Histórica se aproveite para retirar a simbologia franquista e, com ela, precisamente, a memória; a falta da valentia política necessária para fazer nossa a causa anti-fascista e, portanto, devolver-lhe ao povo a memória de Manolo Velho, de José Ramom Gomes Gaioso, de Moncho Rei Balvís, simplesmente passa-se a borracha sobre a página incómoda, para fazermos como quem de que nunca houvo umha guerra, umha repressom, umha ditadura. PSOE e BNG burlam as suas próprias leis.

Por último, e para completar este agir tam profundamente covarde e batoteiro, nom há mais que botar umha vista de olhos sobre os nomes baralhados para substituir os nomes franquistas ou para dar nome a ruas novas: Por suposto, nem um só nome relacionado com a causa anti-fascista; Linneo, Darwin e, polo meio, um nome que nom precisamente leva associado o amor polo povo galego...nada menos que Napoleon Bonaparte, cujas pretensons imperialistas sobre a Galiza forom respondidas de maneira heróica polo nosso povo. Mas, claro, suponhemos que para nom ferir o orgulho imperial da França, os nossos governantes locais preferirám homenagear ao sanguinário emperador de origem corsa e nom aos miles de filh@s sem rosto do povo galego que o combaterom e que morrerom defendendo a sua terra e a sua dignidade.

Estám a retirar a simbologia franquista, mas estám-nos a calotear. Eludem que o povo reconquiste a memória própria, os nomes próprios de umha luita que foi honorável e justa. Os nomes daqueles e aquelas que morrerom pagando a sua negativa a se submeter ao terror fascista.

Ramiro Vidal Alvarinho

Europa luita contra a crise (III) : Ocupaçom de umha sucursal do Banco de Santander em Sevilha

Membros do Sindicato Andaluz de Trabajadores ocupam umha sucursal do Banco de Santander

Europa luita contra a crise (II): Movilizaçons na Corunha e Vigo

Dentro da série de documentos gráficos "Europa luita contra a crise", e desta vez por cortesia da CIG, oferecemos três novos vídeos: um da manifestaçom polo emprego na automoçom em Vigo, e outros dous da greve polo convénio no sector do comércio na Corunha.

Europa luita contra a crise: Jornada de luita estudantil em Milám

Dentro de umha série de crónicas gráficas que titularemos "Europa luita contra a crise", hoje oferecemos três vídeos sobre a jornada de luita em Milám contra o "Decreto Gelmini". Tendes informaçom mais detalhada em kaosenlared.net

Juízo político a dous activistas da AMI