quinta-feira, maio 29, 2008

Amanhá no Gomes Gaioso

Sessom de música jamaicana

Na próxima sexta-feira, 30 de Maio, às 21:30, começará umha sessom de música jamaicana a cárrego do DJ ferrolano Costrojan e os corunheses Dani e The Mexican.

Costrojan já amenizou várias sessons nos diferentes centros sociais galegos e adoptou este nome artístico em alusom à sua predilecçom polos artistas que editarom sob o histórico selo inglês Trojan. Dani é, aliás de dj, saxofonista da banda de ska Dandy Fever.



Alberte Momán falará da sua última obra narrativa no Gomes Gaioso

O escritor ferrolano Alberte Momán Noval estará o dia 30 de Maio às 20:30 horas no Centro Social Gomes Gaioso para apresentar o seu último romance, “O alento da musa”. Este trabalho narrativo desenvolve-se numha cidade tam agredida pola crise industrial como pode ser Vigo, localidade na que o autor residiu durante algum tempo.

O protagonista sente-se engaiolado pola pessoa aparentemente insignificante de umha caixeira de um hipermercado. À partir daí vai imaginando o que poderia ser a história de alguém tam cinzento e esquecido. O próprio autor reconhece que a história tem traços auto-biográficos. Afinal do acto, também se lerám poemas do seu último livro electrónico, “Ferrol e o que queda por chover”.

Alberte Momán nasceu em Ferrol em 1976 e conta na sua trajectória literária com incursons na poesia, o teatro e a narraçom. Actualmente reside em Compostela e trabalha como engenheiro técnico agrícola.

segunda-feira, maio 26, 2008

Mar de fundo no PP galego

Passo a reproduzir o que atopei a esse respeito hoje em Vieiros:

As balas perdidas de Génova tamén rebotan no PPdeG

Os conservadores están convencidos de que os enfrontamentos internos poden pasarlle unha forte factura nos vindeiros comicios autonómicos.

R.V. - 10:30 25/05/2008

O PPdeG apoia unanimemente a Mariano Rajoy, iso é polo menos a mensaxe que se quere transmitir aos medios. O presidente dos conservadores galegos, Alberto Núñez Feijoo, está a pechar filas arredor do foi o seu mentor político. O denominado "sector duro" nucleado arredor de Esperanza Aguirre, Jaime Mayor Oreja, María San Gil e numerosos altos cargos dos gobernos Aznar, mantén o pulso para cortarlle a cabeza a Rajoy e queimar de paso as cartas nas que se apoia, nomeadamente o Alcalde de Madrid, Alberto Ruíz-Gallardón.

Fontes do PPdeG recoñecen que a "guerra civil" que vive o PP a nivel estatal pode influir, e moito, en Galiza. Nas filas conservadoras galegas dáse por feito que, de cara o futuro, Rajoy está “moi tocado” e, comezando polo seu propio líder, arelan un PP español onde Ruíz-Gallardón teña un peso específico.

Xornais como El Mundo ou a emisora radiofónica Cope, disparan sen tregua contra Mariano Rajoy e contra todos aqueles que o apoian publicamente, incluído o fundador da formación conservadora, Manuel Fraga. Esta actitude está a sorprender a algúns dirixentes do PPdeG, que lembran que a cadea de radio depende directamente da Conferencia Espicopal, que dirixe Rouco Varela. O feito de que o cardeal vilalbés e o ex presidente da Xunta compartan "patria pequena" e que incluso mantivesen unha estreita relación ao longo dos anos semella servir de pouco. Dende a súa chegada a Madrid, Rouco Varela mostrou a súa simpatía cara os sectores máis "aznaristas”.

"Os militantes están preocupados"

A grave crise que abanea o PP a nivel estatal está a inquietar ás bases da dereita galega. Un alcalde da provincia da Coruña recoñece que o que está a acontecer en Madrid está a desanimar as bases galegas: "Os militantes están preocupados porque lles parece que isto se vai desfacer todo”. Outras fontes conservadoras sinalan que os enfrontamentos van pasar factura nas vindeiras eleccións autonómicas e dan por feita unha importante caída no número de deputados.

Precisamente, as eleccións galegas, que a priori se agardan para a vindeira primavera, van ser unha dura proba de lume tamén a nivel do PP español. Os críticos dan por feita unha seria derrota dos de Núñez Feijoo, factura que non dubidarán en pasarlle a Mariano Rajoy, se para daquela o pontevedrés non ten tirado a toalla.




NUNHA ENTREVISTA NA RADIO GALEGA

Crespo non descarta pactar nun futuro co BNG porque “na terra dos lobos hai que ouvear coma todos”

O rexedor lalinense cre que de momento non é fácil o entendemento pero avogou por deixar as portas abertas.

Redacción - 13:35 25/05/2008
Tags: BNG pacto PPdeG

O alcalde de Lalín, Xosé Crespo, cre que un pacto político entre o PPdeG e o BNG non é de momento fácil mais deixou a porta aberta de cara ao futuro cun "nunca se debe descartar nada". Nunha entrevista na Radio Galega este domingo, o dirixente popular defendiu que un partido democrático nunca debe renunciar a negociar con outro que tamén o é. Botando man do refraneiro Crespo espetou un "na terra dos lobos hai que ouvear coma todos" e avogou por ser flexíbeis, sen renunciar aos principios, á hora de dialogar con outras forzas.

Crespo sinalou que os conservadores xa están a quentar motores de cara os vindeiros comicios autonómicos e mostrouse convencido de que "se o partido apreta" poden acadar a maioría absoluta. Porén, o ex vicesecretario xeral do PPdeG recoñeceu que o partido non vive un bo momento a nivel estatal aínda que se mostrou seguro de que Rajoy vai saír "fortalecido" do congreso de xuño.

quinta-feira, maio 22, 2008

Bob Dylan dá que falar na Corunha


Nom sei se algum dia alguém dará calado a chúvia, o que nom cessa é a chuvieira de réplicas, contra-réplicas e reacçons a conta de umhas declaraçons de Carlos González-Garcés e sobretudo de Henrique Tello sobre Bob Dylan. Parece ser que o astro do country-rock puido ser contratado no seu dia para as festas da Corunha e o Concelho descartou contar com ele, nom se sabe muito bem se porque nom era do agrado pessoal do concelheiro do ramo, González-Garcés, ou porque pedia uns honorários demasiado altos.

Enfim, eu penso que a política cultural de um concelho nom a midem as festas, ainda que sim que penso que podem ser em certa medida um pequeno espelho do conceito de cultura que tenhem os que mandam na casa consistorial. Em qualquer caso, penso que se vanaliza de maneira intencionada, por parte dos meios de comunicaçom esta questom, nom indo ao fundo do problema que é o de sempre. Que nom muda o estilo de fazer política no Paço de Maria Pita. E elude-se a responsabilidade política. Henrique Tello puido ter dito umha verdadeira parvada, puido ser um idiota ou simplesmente um inoportuno. Mas é González Garcés o responsável deste tipo de decisons, a de descartar a Dylan e a de incluir no programa outras atracçons de discutível qualidade.

E o problema nom é Dylan ou nom Dylan, insisto. O problema é a maneira despótica de governar, sempre sob o critério dos gostos ou o capricho pessoal.

domingo, maio 18, 2008

Chistes de "gallegos"

Un indivíduo chamado Ricardo Parrotta, que se fai chamar escritor, jornalista e humorista, vem de publicar o seu terceiro livro de "chistes de gallegos". Piadas sobre os galegos, que mostram a este povo como um colectivo de indivíduos imbéceis e ignorantes.

Humor racista sempre o houvo. O problema é que alguns pretendem, polos vistos, elevá-lo à categoria de literatura. Há umha editora que cometeu o imenso erro de publicar este compéndio de infámias contra o nosso povo e há um autodenominado escritor ao que nom se lhe pode negar um claro olfato para cheirar o dólar, que está a fazer muitos cartos com estes livros. E eu penso que há um problema de falta de ética, de nom saber onde está o limite do tolerável no humor. Em geral, nunca gostei das piadas de galegos, nem de negros, nem de judéus, nem de ciganos, nem de árabes, nem de bascos, nem de catalans, nem de leperos. Nunca gostei, nunca lhes atopei graça.E a verdade, acho de péssimo gosto que se publiquem estas cousas. Desde logo, se umha editora galega publicasse um livro de piadas sobre argentinos, eu protestaria.

O preocupante é que parece que este indivíduo por um lado pretende tirar-lhe ferro ao assunto e polo outro defende-se atacando.Ao tempo que di nom ser racista nem albergar nengum sentimento negativo contra a Galiza, afirma que o governo galego é nazista, porque no seu web se afirma que a raza celta é superior. Homem, se isto fora assim, chamar-lhes nazistas era pouco. O problema é que umha afirmaçom assim há-na que demostrar, e temo que isso nom vai ser possível. Visito com asiduidade o web da Xunta, por diferentes motivos, e nunca vim texto algum alussivo a nengumha raza...polo menos humana (outra cousa é que se fale do porco celta ou da raza rúbia galega, que como todos sabemos é umha raza de vacas) e por aquí pode-lhe medrar outro anano ao senhor Parrotta, muito apressado em declarar o seu amor e admiraçom pola Galiza, mas que, nom contento com atacar ao povo galego, ataca às suas instituiçons. Sempre é relativa e discutível a legitimidade ou nom de qualquer instituiçom, mas desde logo há manhas dialécticas que merecem o esnaframento do funambulista que as utiliza. Eu, que nom som autonomista, rirei a cachom como o governo autonómico decida demandar a este "tipo listo".

sábado, maio 17, 2008

Dia das Letras

Hoje é Dia das Letras. Nom deveria ser umha data especial, ou sim mas de diferente maneira. Oxalá houvesse menos actos institucionais e mais actos arredor desta data surgidos da iniciativa popular. Que a sociedade galega assomisse a festa das letras de umha maneira participativa, que celebrasse este dia por sentir que se homenagea algo próprio.

Os problemas da língua galega nom se vam solucionar nem celebrando quarenta dias das letras mais. O que se passa é que a maneira de viver o Dia das Letras é sintomático de como se assome e se vive um facto tam decisivo como a língua. Polo demais, contribuiu esta festa a que os autores até o de agora homenageados se leram mais e se conheceram mais? Cumpriria fazer valance disso.

Este ano o homenageado é Xosé Maria Álvarez-Blázquez, que por certo era o pai do nosso amigo Celso Álvarez-Cáccamo. Pois aí vos deixo, com umha interessante compilaçom de material sobre o polifacético Álvarez-Blázquez.

terça-feira, maio 13, 2008

Rap em Cuba

Um pequeno vídeo que mostra umha realidade pouco conhecida de Cuba...a gente nova que cria, com poucos méios e muita ilusom, sem vender-se ao poderoso vizinho ianque.


cubainformacion.tv

segunda-feira, maio 12, 2008

SGAE e Ramoncín contra a liberdade de expressom

Nom som anarquista, nem nada parecido. Nom fai falta sé-lo para estar do lado da decência e em contra do gangsterismo descarado da SGAE e o cinismo insuportável de Ramoncín. Para estar em contra da inquisiçom e a favor da liberdade.

Neste blog a liberdade é um valor innegociável. Nem a SGAE, nem a AVT, nem outras impúdicas inquisiçons que andam por aí na procura de presas fáceis tenhem sítio aquí. Sim que tenhem sítio aqueles e aquelas que defendam a justiça, a liberdade, aqueles que defendem aos desfavorecidos, aos oprimidos, aos marginalizados aos débiles.

Portanto desde este blog expressamos a nossa total solidariedade com o sindicato CNT e o sítio web alasbarricadas.org, vítimas da perseguiçom fascista iniciada polo sindicato patronal SGAE e polo chupóptero Ramoncín e apoiamos a sua campanha de contra-ataque. Que paguem os seus canapés trabalhando e nom especulando.


sexta-feira, maio 09, 2008

Heavy metal


As portas do inferno abrem-se no Gomes Gaioso


quarta-feira, maio 07, 2008

A história das cousas.

Paga a pena ver com atençom este interessante e didáctico vídeo sobre a sociedade de consumo na que vivemos. Convida a reflectir sobre a interessante questom de de onde provem cada cousa que posuimos e onde vai parar. As conclusons às que podemos chegar dam para pôr em causa muito seriamente o nosso estilo de vida.



sábado, maio 03, 2008

A Mesa do Parlamento nom admite a trámite umha iniciativa legislativa de Esquerda Unida

No ano 1992 o governo Fraga, na sua primeira maioria absoluta, tirava adiante umha reforma da lei eleitoral, que estabelecia num 5% o mínimo para ter direito a representaçom parlamentar. Claramente, o Partido Popular pretendia librar-se da presença de partidos que podiam fazer de "bisagra" que facilitasse o accesso do PSOE ao governo da autonomia. Já no seu dia, partidos minoritários como Coalición Galega, o Partido Nacionalista Galego e o PSG-EG apoiaram umha moçom de censura contra Xerardo Fernández Albor. Manuel Fraga nom desejava, logicamente, que essa situaçom se repetisse. Também esta reforma estava claramente direccionada a frear a ascensom do BNG, cousa que a tal artimanha nom conseguiu.

Esquerda Unida quer reduzir o mínimo estabelecido a um 3%. Consideram a sua ausência no Parlamento Galego como umha "anomalia democrática" (isto, em palavras do próprio Gaspar Llamazares)

A verdade é que Esquerda Unida na Galiza tem umha presença quase anecdótica, se excluimos determinados feudos onde mantenhem um núcleo de militança considerável e certo poder institucional. Nas últimas eleiçons autonómicas obtiverom um nível de apoios inferior ao 1% em todo o território da CAG, ou seja que ficarom bastante por embaixo desse 3% teoricamente mais democrático. De todos os jeitos, é umha reivindicaçom legítima, naturalmente.

Mas o problema da democracia real na Galiza ou no resto do mundo nom se cinge a mínimos eleitorais. O problema está numhas normas do jogo democrático que, em geral,permitem todo tipo de cacicadas e traiçons. O deputado ou concelheiro de turno obstenta o seu cargo durante anos, sem submeter-se a nengum tipo de controlo, sem que se lhe poida revogar do seu posto.Se és um representante do povo, tens-te que submeter ao controlo do povo. E o sistema que temos aquí nom permite um controlo directo; limita a capacidade de decisom da gente da rua ao sufrágio, exercício de participaçom cidadá que a propaganda oficial nos vende como o summum da democracia. É claro que enganosamente.

Essa deveria ser a verdadeira batalha da esquerda em geral, e nom andar regateando sobre percentagens mínimas para entrar no Parlamento. Parece que Esquerda Unida mais do que reivindicar umha causa de justiça democrática o que está é a reclamar um privilégio. O privilégio de entrar no bando dos "maioritários" e poder assim participar do festim institucional com mais cacho.

sexta-feira, maio 02, 2008

A vida como corrida de obstáculos

Comecei a ter curiosidade por esta modalidade de desporto urbanícola a raíz de que no bar do meu irmao tinha alguns vídeos que, por certo, pom muito a miudo. Tenho sana inveja destes atletas, que vam pola vida com umha filosofia muito peculiar que se poderia resomir em: porquê vou rodear esse prédio se o poido escalar?